波之上（那覇市）

那覇（なあふぁ）ぬ海端（うみばた）あ、いいくる整備（しいび）けえさってぃ、なあ昔（んかし）ぬ面影（うむかじ）え、無（ね）えらんなとおしが、波之上（波上＝なんみん）ぬ岩（しい）や昔から変わてえ居（をぅ）らな、読谷（ゆんたん）ぬ万座毛（まんざもう）とぅん似（に）ちょおん。
　岩ぬ下（しちゃ）んかいや洞穴遺跡ぬあん。波上宮ぬ南（ふぇえ）むてぃいんかいあぬ護国寺（ぐくじ）んかいや英国人（イギリシんちゅ）ぬ宣教師ぬ８年が間（ゑえだ）住（す）どおたん、うぬ人（ちゅ）ぬ名（なあ）やベッテルハイム。うちなあんちゅからあ、波上（なんみん）ぬ眼鏡（がんちょう）んでぃ言ゃっとおたん。
　彼（うり）がじなん女（ゐなぐ）ん子（ぐぁ）あ、琉球（るうちゅう）んじ生（ん）まりたる一番初（はじ）みぬ西欧人やんでぃぬ事（くとぅ）。
　キリスト教（ちょう）ぬ布教活動（ふちょうくぁちどう）やしみるなんでぃゆる王府役人達（くぁんにんちゃあ）とぅ当たらな、ペリー提督（てぃいとぅく）が琉球んかい来（ち）ゃるるばす、まじゅん米国（びいくく）んかい去（は）ちゃん。

 2011年6月1日投稿分

【語句】
那覇ぬ海端あ＝那覇の海岸は
いいくる整備けえさってぃ＝殆ど整備されてしまい
なあ昔ぬ面影え＝もはや昔の面影は
無えらんなとおしが＝無くなっているが
波之上（波上）ぬ岩や＝波上の岩は
昔から変わてえ居らな＝昔から変わってなく、
読谷ぬ万座毛とぅん＝読谷の万座毛とも
似ちょおん＝似ている。
岩ぬ下んかいや＝岩の下には
洞穴遺跡ぬあん＝洞穴遺跡がある。
波上宮ぬ南むてぃいんかいあぬ護国寺んかいや＝波上宮の南にある護国寺には
英国人ぬ宣教師ベッテルハイムぬ＝英国人宣教師ベッテルハイムが
８年ぐれえ住どおたたん＝８年ほど住んでいた。
うぬ人ぬ名やベッテルハイム＝その者の名はベッテルハイム。
うちなあんちゅからあ＝沖縄人からは
波上ぬ眼鏡んでぃ＝波上の眼鏡と
言ゃとおたん＝呼ばれていた。
彼がじなん女ん子あ＝彼の次女は。「じなん女ん子」の「じなん」は、日本語の「次男」から転じた語で、ここでは「二番目の子の意味」
琉球んじ生まりたる＝琉球で生まれた
一番初みぬ西欧人やんでぃぬ事＝一番最初に生まれた西洋人とのこと。
キリスト教ぬ布教活動やしみるなんでぃゆる＝キリスト教の布教活動はさせるなという
王府役人達とぅ当たらな＝王府役人とうまく行かず
ペリー提督が琉球んかい来ゃるるばす＝ペリー帝国が来流した際、
まじゅん米国んかい去ちゃん＝一緒に米国へ行ってしまった。「去ちゃん」は「去る」という意味だが、「行ってしまう」のニュアンスが強い。