玉城城跡（南城市）

2020/3/1

　くぬ前（めえ）、長（なげ）えさ行（ん）じんだんたる玉城城（たまぐしくぐしく）んかい行じゃれえ、足場（くだみどぅくる）ぬ新（みい）くにけえ造（つく）らっとおたん。
　やぐとぅ、前に撮（ぬ）じゃるくぬ写真（しゃしん）とお今（なま）あ変（か）わとおん。＊上（うゐい）ぬ写真や前ぬむん。
　近頃（ちかぐる）お遺跡（あとぅかた）んでえぬ観光所（ゐいりきどぅくる）んかいや観光客（ちゃく）向（む）ちいなかい、特（かわ）てぃ足場んでえぬ造いしぎらってぃ、小（くう）さいにいから見（ん）じ慣（な）りとおる地（じい）ん人（ちゅ）からあ、異風（いふう）なあなてぃ見（み）ゆる事（くとぅ）んあら筈（はじ）やん。
　写真ぬ写（うち）い様（よう）や目外（みは）んだあなゆしが、遺跡守（まむ）たい保（たむ）ちゃいする為（たみ）ねえ、仕方（しかた）あ無（ね）えらん。
　近（ちか）くんかいや、あまみちゅぬ居（をぅ）たんでぃぬ伝（ちて）え話（ばなしい）ぬある明東城（みんとぅんぐしく）から垣花城（かちぬはなぐしく）、糸数城（いちゅかじぐしく）んあん。
　くぬ城んかいん伝え話や色々（いるいる）、あしが、くったあ城（ぐしく）ぬ主（ぬうし）ん達（ちゃあ）や如何（ちゃ）ぬ様（ゆう）に関（かが）なてぃ居（をぅ）たらあ。
　　若（む）しか明東城が創（はじ）まいやれえ、他（ふか）ぬ城ぬ主達や、うぬ後々（あとぅあとぅ）ぬ人（ちゅ）ん達がやら。

【語句】
くぬ前、長えさ行んだんたる玉城城んかい行じゃれえ＝このまえ、久しぶりに玉城城にいってみたら、
足場ぬ新くにけえ造らっとおたん＝足場が架けられてしまっていた。
やぐとぅ、前に撮じゃるくぬ写真とお今あ変わとおん＝だから以前に撮った写真とは変わってしまっている。
＊上ぬ写真や前ぬむん=上の写真は以前にとったもの。
近頃お遺跡んでえぬ観光んかいや光客向ちいなかい＝最近は遺跡などの観光地には観光客向けに
特てぃ足場んでえぬ造いしぎらってぃ＝特に足場などが付加されて、
小さいにいから見じ慣りとおる地ん人からあ＝幼い頃から見慣れた地元の人にとっては、
異風なあなてぃ見ゆる事んあら筈やん＝妙に見えることもあるだろう。
写真ぬ写い様や目外んだあなゆしが、遺跡守たい保ちゃいする為ねえ＝写真写りは愕然とするが、遺跡を守り保存するためなら
仕方あ無えらん＝いたし方ない。
近くんかいや、あまみちゅぬ居たんでぃぬ伝え話ぬある明東城から＝近くにはアマミキヨが居城したとされるミントゥングシクはじめ、
垣花城、糸数城んあん＝垣花城、糸数城もある。
くぬ城んかいん伝え話や色々、あしが、くったあ城ぬ主ん達や＝この城には様々な伝説があるが、居城者たちは
如何ぬ様に関なてぃ居たらあ＝どのような関りがあったのだろうか。
若しか明東城が創まいやれえ、他ぬ城ぬ主達や＝もし、ミントゥングシクが創まりなら、他の城の主たちは、
うぬ後々ぬ人ん達がやら＝アマミキヨの後継者たちなのだろうか。