沖縄戦（うちなあぬいくさ）ぬばす、沖縄県立第一学校ぬ学生達（がくしいたあ）や学徒兵（がくとぅひい）とぅさあに、取（とぅ）らったん。
戦ん終（う）わいがたあやたる６月（るくぐゎち）ぬ下（しむ）、兵隊（ひいたい）とぅまじゅん、斬（ち）り込（く）みしが行（ん）じゃあい、多（うふ）くぬ学生ぬ死（し）じゃん。
写真やうったあが祀（まち）らっとおる慰霊碑（いりいぬふぃい）やん。
戦死（いくさじ）にさる学生達ぬ名（なあ）ん彫（ふ）らっとおん。
映画（いいが）「ひめゆりの塔」（日活、吉永小百合主演、1968年）んじえ、ひめゆり部隊とぅ学徒隊がまじゅん、なゆる場面（かあがあ）ぬまんどおたしが、あぬ学徒隊や一中健児どぅモデルそおたらあ。
世界中（しけじゅう）んじ戦あ、間（みい）さげえ無（ね）えらんしが、あんし年若（とぅしわか）さる学生達、学校（がっこう）ぐうとぅ、丸担（まんがた）みいし戦んかい組（く）み入（い）りたる例（りい）や他（ふか）ねえ無（ね）えらん筈（はじ）。
沖縄（うちなあ）ぬ基地（ちち）ぬわちゃれえ事（ぐとぅ）や今（なま）ちきてぃ、沖縄が戦ぬ先（さち）んかい置（う）かっとおる印（しるし）えあらに。
【語句】
沖縄戦ぬばす、沖縄県立第一学校ぬ学生達や＝沖縄戦の時、沖縄県立第一中学校の学生達は
学徒兵とぅさあに、取らったん＝学徒兵として招集された。
戦ん終わいがたあやたる６月ぬ下、兵隊とぅまじゅん＝戦争の集結間近の６月下旬、兵隊と共に、
斬り込みしが行じゃあい、多くぬ学生ぬ死じゃん＝斬り込みに行き、多くの学生が戦死した。
写真やうったあが祀らっとおる慰霊碑やん＝写真は彼らが祀られている慰霊碑である。
戦死にさる学生達ぬ名ん彫らっとおん＝戦死した学生らの名前も刻まれている。
映画「あゝ、ひめゆりの塔」（日活、吉永小百合主演、1968年）んじえ＝映画「あゝ、ひめゆりの塔」では、
ひめゆり部隊とぅ学徒隊がまじゅん、なゆる場面ぬまんどおたしが＝ひめゆり部隊と学徒隊が一緒になる場面が多かったが、
あぬ学徒隊や一中健児どぅモデルそおたらあ＝あの学徒隊は一中健児がモデルだったのか。
世界中んじ戦あ、間さげえ無えらんしが、あんし年若さる学生達＝世界中で戦争は絶え間なく続いているが、こんなにも若い学生らが
学校ぐうとぅ、丸担みいし戦んかい組み入りたる例や＝学校ごと、戦闘に巻き込んだ事例は
他ねえ無えらん筈=ほかに例はないだろう。
沖縄ぬ基地ぬわちゃれえ事や今ちきてぃ＝沖縄の基地の諸問題は
沖縄が戦ぬ先んかい置かっとおる印えあらに＝沖縄が今だに、戦線に配置されている事ではないのか。
この記事へのコメント