写真（しゃしん）や、まあがな他所国（ゆすぐに）ぬ景色（ちいち）ねえそおしが、那覇（なあふぁ）ぬ西海端（いりうみばた）ぬ朝明（あさあ）けえいどぅやる。
波之上（なんみん）ぬ浜（はま）ぬ他（ふか）あ、いいくる空港（くうこう）とぅ港（んなとぅ）どぅなとおる。
写真ぬ真（ま）ん中（なか）ぐるから左（ふぃざい）むてぃんかい太線（ぶっとうしん）ぬ如（ぐとぅ）し、伸（ぬ）びてぃ行（ん）じょうる陸橋（あぎばし）や、くぬ前（めえ）どぅ造（つく）らっとおるんでぃぬ覚（うび）いぬあしが、造らってぃから、なあ何十年（なんじゅうに）ぬんないん。
今（なま）ぬ世（ゆう）や、まあぬ国（くに）ん同（い）ぬむんやら筈（はじ）やしが、都会（まちがた）ぬ生（じょう）じ様（よう）や、ふしがらんあい、実（じゅん）に目張（みいは）い事（ぐとぅ）やん。
特（かわ）てぃ、物（むん）ぬ出（ん）じたい入（い）っちゃいすぬ港とぅか空港ぬある町やれえ、田舎（いなか）やかん、生じ様ぬうすませえ当（あ）たい前（めえ）がやらん分からん。
色数（いるかじ）ある生（い）ち物（むし）ぬ中（なあか）んじん、互（たげ）えに連（ち）り揃（すり）てぃ、物作合（むぬづくえ）えぬないせえ、ホモサピエンスびけんどぅやる。言葉（くとぅば）使（ちか）てぃ唾（とぅんぺえ）飛（とぅ）ばする生ち物ややてぃん、コロナんかい負（ま）きらんたるホモサピエンス加那志（がなしい）…。
【語句】
写真や、まあがな他所国ぬ景色ねえそおしが＝写真はどこか外国の景色みたいではあるが。
那覇ぬ西海端ぬ朝明けえいどぅやる＝那覇の西海岸の夜明けの風景である。
那覇の西海岸は波之上ぬ浜ぬ他あ、いいくる空港とぅ港どぅなとおる＝那覇の西海岸は波之上の浜辺等の他は殆ど空港か港である。
写真ぬ真ん中ぐるから左むてぃんかい太線ぬ如し＝写真の中央ほどから左側にかけて太い線のように、
伸びてぃ行じょうる陸橋や、くぬ前どぅ造らっとおるんでぃぬ覚いぬあしが＝伸びる陸橋が造られたのはこの前だったような記憶があるが、
造らってぃから、なあ何十年ぬんないん＝造られてからもう何十年にもなる。
今ぬ世や、まあぬ国ん同ぬむんやら筈やしが、都会ぬ生じ様や＝現代はどこの国も同じだとは思うが、都会の発展のしかたは、
ふしがらんあい、実に目張い事やん＝非常なほどであり、実に驚くべき早さである。
特てぃ、物ぬ出じたい入っちゃいすぬ港とぅか空港ぬある町やれえ＝特に物流の出入りのある港や空港のある都市の場合は、
田舎やかん、生じ様ぬうすまさしえ当たい前がやらん分からん＝地方より発展度合の激しいのは当然なのかも知れない。
色数ある生ち物ぬ中んじん、互えに連り揃てぃ＝数々ある動物の中でも互いに集合し、
物作合えぬないせえ、ホモサピエンスびけんどぅやる＝ものづくりのできるのはホモサピエンスだけである。
言葉使てぃ唾飛ばする生ち物ややてぃん＝言葉を操り。飛沫を飛ばす動物であっても
コロナんかい負きらんたるホモサピエンス加那志…＝コロナウイルスに打ち勝ってきたホモサピエンス殿よ…。
この記事へのコメント
うちなあぐち初心者