くぬ川（かあら）あ、南城市ゆ水源（みじむとぅ）とぅしち、糸満（いとぅまん）ぬ報得川んかい流（なが）り行（い）ちゅる川やん。
名（なあ）や分（わ）からん。
今（なま）あ、いいくるぬ川ぬ川岸（かあちし）え、大概（てえげえ）、コンクリート普請（ぶしん）けえさっとおしが、くぬ川ぬ岸え普請さってえ居（をぅ）らんくとぅ、写真（しゃしん）抜（ぬ）じん、絵（いい）んかいなゆん。
あらん又（また）、普請さっとおしえさっとおしが、草木（くさきい）んかい隠（かく）りてぃが居（をぅ）らん知（し）らん。
今（なま）あ昔（んかし）ねえし茅敷（かやしち）ん諸（むる）、畑（はたき）んかいけえなやあい、薄茅ん、畑から追（ゐい）い払（ほう）らっらたる如（ぐとぅ）さあに、川ぬあむとぅんかい縋（しが）やあい、生（い）ちちいかんでえならんなとおる風儀（ふうじ）。
昔え、茅（がや）あ百姓（ひゃくしょう）ぬ家造（やあづく）いすぬ大切（てえしち）な材（ぜえ）とぅしち、他所村（ゆすむら）ぬ人（ちゅ）なかい、けえ刈（か）ららんねえし、番（ばあん）さあぬ居たるあたい、あたらささっとおたるむぬやしが、今あ邪魔草（じゃまくさ）扱（あちけ）えけえさってぃ…。
【語句】
くぬ川あ、南城市ゆ水源とぅしち、糸満ぬ報得川んかい＝この川は南城市を水源として糸満の報得川に
流り行ちゅる川やん＝流れいく川である。
名や分からん＝名は知らない。
今あ、いいくるぬ川ぬ川岸え＝今は殆どの川岸は
大概コンクリート普請けえさっとおしが＝大抵コンクリート工事されているが、
くぬ川ぬ岸え普請さってえ居らんくとぅ＝この川の岸は工事されてないので、
写真抜じん、絵んかいなゆん＝撮影しても絵になる。
あらん又、普請さっとおしえさっとおしが＝いや、あるいは工事はされていることはいるが、
草木んかい隠りてぃが居らん知らん＝草木の覆われているのかもしれない。
今あ昔、あたらささっとおたる茅敷ん＝今は昔、大事にされていた茅の専用敷地も
諸、畑んかいけえなやあい、薄茅ん＝ことごとく、農地にされてしまい、ススキ茅も
畑から追い払らってぃ、川ぬあむとぅんかい縋やあい＝農地から追い払われ、川も土手にしがみ付いて
生ちちいかんでえならんなとおる風儀＝生き伸びていかなければならない様子。
昔え、茅あ百姓ぬ家造いすぬ大切な材とぅしち＝昔は茅は平民の家屋の大切な建築材料として
他所村ぬ人なかい、けえ刈ららねえし＝他所村の人に刈りとられないように
番さあぬ居たるあたい、あたらささっとおたるむぬやしが＝見張りも立てるほど、大事にされていたものだが、
今あ邪魔草扱えけえさってぃ…＝今は邪魔もの扱いされてしまっている…。
この記事へのコメント