「♪ヒョーホー、まるまぶんさん、夜（ゆ）な夜な見（み）りば～♪」でぃち、歌（うた）に歌あらっとおるまるま盆山（ぶんさん）や祖納（しすない、そね）ジマぬ海端（うみばた）んかいある岩島小（しいしまぐゎあ）やん。
海神祭（しちまちい）ぬばすお、ハーリー勝負（しゅうぶ）とぅ似（に）ちょおる舟勝負（ふにしゅうぶ）んなさりいん。
うぬばす、陸（あぎ）ぬあんまあ達（たあ）ぬ舞（も）うい様（よう）ぬどぅゐいりきさる。
本島（じじうち）んじえ、いいくるカチャーシーどぅやしが、手様（てぃいよう）や「招（まに）ち手（てぃ）」なやあに、伊波普猷ぬ言（い）ちょおたる昔（んかし）ぬ舞（も）うい様（よう）がやら。
うぬ手んかい「押手」とぅちがあるうし、また右左（にじりふぃじゃい）んちがるうしみいねえ、カチャーシー手（でぃい）けえなゆん。
西表（いりむてぃ）ぬ自然（しじん）や人ぬ肝心（ちむぐくる）ん映（うつ）ちょおんねえ思（うま）ありいん。
まんぐらぬ海（うみ）んかいやアミリカぬグラマン戦闘機ぬ沈（しず）どおんでぃぬ話（はなし）しんあしが、人（ちゅ）にとぅてえ一番（いちばん）ぬ宝（たから）あ平和（ひいわ）どぅやる。平和ぬむとぅうち行（い）ちゅる如（ぐとぅ）、祈（いぬ）ら。
筆：比嘉清。
【語句】
ヒョーホーまるまぶんさん、夜な夜な見りば～＝ヒョーホー、まるまぶんさんを夜な夜な見れば、
でぃち歌に歌あらっとおるまるま盆山や＝と歌に歌われているまるま盆山は、
祖納ジマぬ海端んかいある岩島小やん＝祖納集落の内海にある岩小島である。
海神祭ぬばすお、ハーリー勝負とぅ＝節祭のときには、ハーリー競争に
似ちょおる舟勝負んなさりいん＝似た舟の競争がなされる。
うぬばす、陸ぬあんまあ達ぬ＝そのときの陸側のご婦人方の
舞うい様ぬどぅゐいりきさる＝踊りが面白いのである。
本島んじえ、いいくるカチャーシーどぅやしが＝本島では殆どカチャーシーと決まっているが、
手様や「招ち手」なやあに、伊波普猷ぬ＝手つきは「招き手」であり、伊波普猷が
言ちょおたる昔ぬ舞うい様がやら＝述べている昔の踊り様なのであろうか。
うぬ手んかい「押手」とぅちがあるうし＝この手に「押手」と組み合わせ、
また右左んちがるうしみいねえ＝さらに左右を交互させれば、
カチャーシー手けえなゆん＝カチャーシーの踊り方になっていく。
西表ぬ自然や人ぬ肝心ん＝西表の大自然は人の心象をも
映ちょおんねえ思ありいん＝映しているように感じる。
まんぐらぬ海んかいやアミリカぬグラマン戦闘機ぬ＝付近には米軍のグラマン戦闘機が
沈どおんでぃぬ話しんあしが、人にとぅてえ＝沈んでいるとの話もあるが、人間にとって
一番ぬ宝あ平和どぅやる＝一番の宝は平和である。
平和ぬむとぅうち行ちゅる如、祈ら＝平和が続くように祈ろう。
筆：比嘉清。
この記事へのコメント