<
同（い）ぬ綿（わた）ぬ木（きい）やてぃん、先週（しんしゅう）ぬ糸満（いとぅまん）ぬむぬとお、見場（みいば）あ別（びち）やんねえそおん。
下（しちゃ）んかい落（う）てぃとおる綿取（わたとぅ）てぃ見（ん）んじいねえ、中（なあか）んかいや、西瓜（くゎんとぅんうい、しいくゎあうい）ぬ種（さに）とぅ似（に）ちょおる黒種（くるさに）ぬ二（たあ）ちびけん見（ん）だりいん。
綿（わた）あ軽（が）っさくとぅ、風（かじ）なかい飛（とぅ）ばさってぃ、あまくまんかんじ、子孫（くんまが）繁盛（はんじょう）しみゆる仕組（しくみ）みやいがすら。
やしが、今（なま）ぬ世（ゆう）や地（じい）や、いいくる人間（にんじん）ぬどぅ構（かむ）とおくとぅ、木草（くうくさ）にとぅてえ思（うみ）いが如（ぐとぅ）、繁盛する事（くと）おならん。
一粒（ちゅちぶ）ニ粒（たちぶ）やてぃん、まあがなんじ、芽（みどぅい）ぬ出（ん）じてぃ、程上（ふどぅゐい）てぃ行（い）」ちゅる如（ぐとぅ）、願（にが）らな。
今（なま）あ人人間（ちゅにんじん）ぬ勝手（かってぃ）そおる世（ゆう）や、やしが、かあま先（さち）ぬ世や、又（また）、木草ぬはねえちゅる世（ゆう）んかいないがすら。
うにい迄（まで）え、並木（なんぎい）とぅか公園（くういん）うてぃ、気張（ちば）てぃ呉（くぃ）みそおり。
筆：比嘉清
同ぬ綿ぬ木やてぃん、先週ぬ糸満ぬむぬとお＝同じトックリキワタでも、先週の糸満のそれとは、
見場あ別やんねえそおん＝見た目は別のもののようである。
下んかい落てぃとおる綿取てぃ見んじいねえ、中んかいや＝下に落ちた綿を取ってみると中には、
西瓜ぬ種とぅ似ちょおる黒種ぬ二ちびけん見だりいん＝西瓜の種に似た黒い種が二粒確認できる。
綿あ軽っさくとぅ、風なかい飛ばさってぃ＝綿は軽いので、風に飛ばされて、
あまくまんじ、子孫繁盛しみゆる仕組みやいがすら＝あちこちで子孫を残す仕組みなのだろうか。
やしが、今ぬ世や地や、いいくる人間ぬどぅ＝だが、現代において土地は人間こそが
構とおくとぅ、木草にとぅてえ思いが如＝管理しているのだから、植物のとっては、思い通り、
繁盛する事おならん＝子孫を繫栄させる事はできない。
一粒ニ粒やてぃん、まあがなんじ、芽ぬ出じてぃ＝一粒でも二粒でもどこかで、芽を出して、
程上てぃ行」ちゅる如、願らな＝成長していくよう、願おう。
今あ人人間ぬ勝手そおる世や、やしが＝現代は人類が勝手する時代なのではあるが、
かあま先ぬ世や、又、木草ぬはねえちゅる＝ずっと先の時代は、或いは植物の勝手で繫栄する
世んかいないがすら＝時代になるのかもしれない。
うにい迄え並木とぅか公園うてぃ気張てぃ呉みそおり＝それ迄は並木や公園で頑張って呉れ給え。
筆：比嘉清
この記事へのコメント