久高島（くだかじま）ぬシマ内（うち）え、本島（うふじ）ぬ田舎（いなか）とぅなんぞお変（か）わらのおあしが、屋敷囲（やしちがく）いぬ石垣（いしがち）え、首里（しゅい）ぬ昔石垣（んかいいしがち）ねえし、重（んぶ）らあさん。
かあま昔、島んかい参詣（さんちい）しいがめんそおちゃる御主加那志前（うしがなしいめえ）、御取持（うとぅいむち）いさる歴史（りちし）ぬある名残（なぐい）いがやら。
竹富島（だきどぅんじま）んでえぬシマぬ石垣ぬ積（ち）みい様（よう）とお、むさっとぅ変（か）わゆん。
島んかいやお２００人余（にひゃあくにんあま）いが住（し）どおんでぃぬ事（くとぅ）やしが、道（みち）んじ行会（いちゃ）ゆる人（ちゅ）お、いいくる観光客（みいむんちゃく）びけんどぅやる。
標識（みちしるび）そうな物（むの）お、とぅめえい難（ぐり）くとぅ、地図（ちず）見（ん）ちどぅ回（みぐ）らりいる。
うりかあや、いふぇえ不便やん。
ヌウルぬ屋敷ん今（なま）ちきてぃあしが、王府（くうじ）からぬ禄（るく）ぬ無（ね）えんていん、神拝（かみうが）んや継（ち）がりやい、むとぅうちょおん。
やしがイザイホー祭（まちい）や１９７８年（にん）んじ、さったる後（あと）お、なあ催（むゆう）さってえ居（をぅ）らん。
筆：比嘉清。
久高島ぬシマ内え、本島ぬ田舎とぅなんぞお＝久高島の集落内は本島の田舎とあまり
変わらのおあしが、屋敷囲いぬ石垣え＝変わらないが、屋敷を囲う石垣は、
首里ぬ昔石垣ねえし、重らあさん＝首里集落の昔の石垣のように趣がある。
かあま昔島んかい参詣しいがめんそおちゃる御主加那志前＝ずっと昔、島に参詣しに訪れた王様を
御取持いしちゃる歴史ぬある名残いがやら＝持て成した歴史の名残なのであろうか。
竹富島んでえぬシマぬ石垣ぬ積みい様とお＝竹富島等の集落の石垣の積み方とは全く異なる。
島んかいやお２００人余いが住どおんでぃぬ事やしが＝島には凡そにニ百人余が住むとの事だが、
道んじ行会ゆる人お、いいくる観光客びけんどぅやる＝道で出会う人は殆ど観光客である。
標識そうな物お、とぅめえい難くとぅ＝標識の類は、見つけ難い（あるいは無いのか）ので、
地図見ちどぅ回らりいる＝地図を見ながら周遊するのである。
うりかあや、いふぇえ不便やん＝そこは、少し不便である。
ヌウルぬ屋敷ん今ちきてぃあしが、王府からぬ禄ぬ＝ノロ屋敷は今にあるが、王府からの禄が
無えんていん、神拝んや継がりやい、むとぅうちょおん＝無くても宗教は受け継がれ続いている。
やしがイザイホー祭や１９７８年んじ、さったる後お＝だが、イザイホー祭は1978年を最後に
なあ催さってえ居らん＝行われていない。
筆：比嘉清。
この記事へのコメント