黄金森（くがにむい）んでえや、また御嶽（うたき）ぬ清（ちゅ）ら名（なあ）んやん。

　あんし、うぬ森ぬ頂（ちじ）まんぐらんかい「仏（ふとぅき、ふとぅち）ぬ前（めえ）」んでぃ言（ゆ）る拝所（うがんじゅ）ぬあん。

　くぬ森やまた前に書（か）ちゃる通（とぅう）い、旧（ちゅう）日本軍ぬ病院（びょういん）ぬあたる所（とぅくる）んやたくとぅ、怪我（きが）そおる兵隊（ひいてえ）ぬ連（そ）おらっってぃ来ゅうる所やたしが、また怪我ぬ治（のお）らな亡（ま）あちゃる兵隊んまんどおたんでぃぬ事（くとぅ）。

　くまんかい居（をぅ）たる兵隊達（たあ）にとぅてぃ、くぬ「仏ぬ前」や肝上（ちむゐい）がやたらあ、あねえあらんがあたら分（わ）からん。戦（いく）んでぃせえ人（ちゅ）とぅ人ぬ殺（くる）し合（ええ）。

　人ん人あらんなゆん。

　拝（うが）み事（ぐと）お人ぬ肝心（ちむくくる）さあにどぅするむのおあらに。

　くぬ仏拝（ふとぅきうが）むる兵隊ん居いがすたら分からん。

　くぬ仏えうんな殺し合、如何（ちゃ）ぬ風儀（ふうじい）しが見（ん）ちゃるむぬやらあ。

　とおないねえ、人間（じんじん）てぃらむぬお、何頼（ぬうたる）がきてぃ、何んかい縋（しが）ゆるむぬやら。

筆：比嘉清。

　軍ぬ医療関係（びょういんしんか）４５０名とぅひめゆり学徒隊２００名ぐれえがくまんじ働かさとおたんでぃぬ事（くとぅ）。

　写真（しゃしん）ぬ屋（やあ）や２０豪号ぬ跡（あとぅ）なやい、「見学用（みいむんぬいりゆう）」ぬむんなてぃ、うんにいからあたる訳（わき）えらん。

　左隣（ふぃざいどぅない）んかいある「三角兵舎」や説明板（あんねえばん）ぬ為（たみ）ぬむんどぅやい、実（じゅん）ねえ別（びち）ぬ所（とぅくる）んかいどぅあたんでぃぬ事。

　アミリカ軍（ぐん）ぬ寄（ゆ）してぃ来（ち）、実に戦（いくさ）なたれえ、くぬ森や「地獄の森と化した」（案内板）んでぃぬ事。

　周辺案内図（まあいぬあんねえじ）んかいや「兵士埋葬地点」とぅか「仮埋葬地」んでぃぬ字（じい）んあん。

　やしが、戦ぬ強（ちゅう）まてぃ来（ち）ゃれえ、なあちゃあん成（な）らんなやあに、南部糸満（なんぶいとぅま）ぬんかい移（うち）らんでえならんなたん。

筆：比嘉清。

　黄金森んでえ、他（ふか）に宜野湾（じのおん）ぬんかいあん。

　黄金んでぃぬ名（なあ）や「いっぺえ大切（てえしち）、あたらさ」んでぃゆる積合（ちむええ）ぬあい、あいゆかんぬ「褒（ふ）み言葉（くとうば）」んやん。

「黄金ん子（ぐゎ）」んでえ、大切な思（うみ）ん子んでぃぬ積合やん。

　また、いっぺえ美（ちゅ）らさんでぃぬ意味（ちむええ）ぬある「玉（たま）」付（ち）きてぃ「玉黄金（たまくがに）」んでぃしいねえ、なあ、でえじなぬ思愛（うみがな）さ言葉やん。

　あん考（かんげ）えいねえ、くぬ森や、でえじな良（い）い所なやいどぅ、又（また）、旧日本軍ぬん病院置（う）ちゃらあ。

　ただ黄金ぬ森やんでぃち眺（なが）みいねえ、美らく見（み）ゆしが、旧日本陸軍病院跡やたんでぃ見（ん）じいねえ、くくるてぃるさぬならん。

筆：比嘉清。

　うんにいや、沖縄（うちなあ）ぬ東（あがり）むてぃいぬ海岸（うみばた）や、いいくるしがり波（なみ）ぬ上（あ）がてぃ来（ち）ゃあに、我（わあ）小学校（しょうがっこう）ぬ庭迄（なあまでぃ）、海水（うすみじ）んかい浸（ち）かとおたん。

　うぬ日（ふぃい）、高所（たかどぅくる）んかいあたる自（どぅう）ぬ家（やあ）から学校んかい向（ん）かゆる道中（みちなか）、下（しちゃ）あらから戻（むどぅ）てぃ来（ち）ゅうる生徒（しいとぅ）ん達（ちゃあ）が、「しがり波ぬ来ょおくとぅ、学校や休（やし）み」んでぃち、むさげえとおたん。

　くまぬ二見橋え、大浦湾（うふらわん）ぬんかいあん。

　湾（まがい）や狭（いば）くないるうっさ、しがり波ぬ集（あち）まてぃ来ゅうくとぅ、うりが押し寄しゆるi勢いん又（また）強（ちゅう）くなゆん。

　今（なま）ぬ橋え、でえじな頑丈（がんじゅう）ぎさし造（つく）らっとおしが、如何（ちゃ）ぬあたいぬ耐力（てえぢから）があぬむぬやら。

　何（ぬう）やらわん、自然（しじん）ぬ力（ちから）あ、人（ちゅ）ぬ思寄（うみゆ）いやか上（うゐ）やあらに。

筆：比嘉清。

　左（ふぃざい）むてぃいや、まんぐらぬ山（やま）んでえからぬ水（みじ）ぬ流（なが）りてぃ来（ち）ゅうる川（かあら）なとおん。

　引潮（ふぃちしゅ）ぬ時間（じかん）ぬ当（あ）たらな、潟潮ぬ見（ん）だらんばすお、うんな景色やてぃん眺みてぃん、しゅぞうなゆん。　　

　泳（ゐい）じゅしびけんが海（うみ）ぬ楽（たぬ）しみえあらん、景色眺みたい、浜（はま）ぬ蟹小（がいぐゎあ）とぅ遊（あし）だいすしん又楽（たぬ）しみやあらに。

　他（ふか）ぬ潟原ねえ、埋（う）み立（た）てぃらってぃ街（まち）んかいけえ成（な）たい、橋（はし）ぬ架（か）きらったいし、景色ぬ相変（あいか）わとおる所んあしが、くまあ、うぬ侭（まま）ぬ形（かたち）さあに、残（ぬく）しい欲（ぶ）しゃんでぃ思（うむ）ゆん。

　今（なま）ぬ世（ゆう）やどぅくだら、銭（じん）ぬ力（ちから）ぬ強（ちゅう）さぬ銭ぬ勝手（かってぃ）けえ成とおん。

　肝心（ちむくくる）ぬ豊（ゆた）かさぬ勝（まさ）ゆる世なゆしえ何時（いち）がやら。

筆：比嘉清。

　やしが、他（ふか）ぬ潟原とぅ比（く）なびてぃ、特（か）わとおんでえ思（うま）あらん。

　引（ふぃ）ち潮（しゅ）ぬ万事（ばんじ）やるばすお、潟（かた）んなあふぃん、まぎさ広（ふぃる）がゆる筈（はじ）やしが、くぬ写真（しゃしん）抜（ぬ）じゃるばすお、潮（うしゅ）ん満（み）っちはじみとおたる風儀（ふうじ）なてぃ、潟くるお、あんすから迄（までぃ）、ちびらあさんでえ思（うま）あらんたん。

　やしが、いふぃ小（ぐゎあ）、別（びち）ぬ所（とぅくる）から眺（なが）みいねえ、ちびらあしく見（み）いゆる景色ぬあん。

　又（また）、潟ぬ上辺（うゎあび）んかいや、いちゃっさきいぬ蟹小（がいぐゎあ）ぬ歩（あ）っちゃあ歩っちゃあし、いっぺえ、うじらあさん。

　蟹小達（がいぐゎあたあ）やましやあ。

　何（ぬう）ぬさびん煩（わ）ちゃれえ事（ぐとぅ）ん無（ね）えらな、唯（ただ）、友部（どぅしび）とぅ連（ち）りてぃ遊（あし）ぶるびけん。

筆：比嘉清。

　近（ちか）くぬ大浦湾（うふらわん）はじみ山原（やんばる）おいいくる行（い）ちゅしが、くまんかいイチョウぬ木（きい）ぬ生（みい）いとおんでえ、分（わ）からんたん。

　写真（しゃしん）ぬ真（ま）ん中（なか）ぬ木がうりやん。

　抜（ぬ）じゃしえ、１１月（ぐゎち）半（なか）らやたしが、黄色（ちいる）んかいやなてえ居（をぅ）らな、未（なあ）だ青（おお）ってんどぅそおたる。

　暑（あ）ちゃさどぅあくとぅ、うりん当（あ）たい前（めえ）。

　やしが、何時（いち）が紅葉（むみじ）ないらあ。

　沖縄（うちなあ）んかいや、モクマオウ、綿（わた）ぬ木、ギンネムんでえ、余所（ゆす）から色（いる）んな木草（きいくさ）ぬ入（い）っち来（ち）、大概（てえげえ）や、栄（む）てえとおん。

　やしがくぬイチョウぬ木や１００年（にん）やか前（めえ）に鹿児島（かぐしま）から３本（ぶん）、持（む）ち来（ち）ゃんでぃぬ事（くとぅ）やしが、今（なま）あ、ちんとぅ１本（いっぷん）どぅ残（ぬく）とおる。

　１本やてぃん、イチョウが沖縄（うちなあ）んじん育（すだ）ちゅんでぃぬ徴（しるし）やい、なあふぃん、うゎあち、何時かあ、イチョウ並木（なんぎい）ん見（ん）じゅる事ぬないれえ良（ゆ）たさしが…。

筆：比嘉清。

　くぬダムお復帰前（ふっちめえ）ぬ米軍（びいぐん）が造（つく）い始（はじ）みてぃ、復帰後（ふっちあと）お沖縄県（うちなあきん）がうぬぎれえゆ引（ふぃ）ち継（ち）じぇえる県内（きんうち）んじ一番（いちばん）大（ま）ぎさるむぬなとおん。

　うり迄（まで）えうちなあぬ人（ちゅ）ん達（ちゃあ）や昔（んかし）からぬ慣（なり）んあてぃ、いいくるまんぐらぬ泉（いずん）樋川（ふぃいじゃあ）から水引（みじふぃ）ちゃい汲（く）だいし暮（く）らちょおたん。

　屋敷（やしち）ぬ庭（なあ）、堀（ふ）やい、井戸（かあ）造ゆる家庭（ちねえ）んあたしが、いふぃやてぃん干上（ふぃやあ）い成（な）たいしいねえ、水渇（みじかち）けえ成やい、哀（あわ）りぬ段々（だんだん）し来（ち）ゃるむぬやん。

　あんし、沖縄（うちなあ）んじえ新（しん）に家造（やあづく）いするばあや家頂（やんんちじ）んかい水桶（みじううき）据（い）しらんでえ、建築（やあづくい）ぬ許（ゆ）りや下（う）りらんたん。

　やしが今（なま）あ、あまくまんじダムぬ成てぃ、水渇んいいくる無（ね）えらんなやい、水桶据しらんてぃん家造ぬ成ゆんねえなたるむぬやしが、去（ん）じゃる25日んじ大宜味村（うじみすん）うてぃ水道管（ふぃいじゃあぐうだ）ぬはっ穿（ぷ）ぎやあい、ダンクぬ備（すな）わてえ無えらん家やまあまあしく水止（みじどぅ）けえ成たん。

筆：比嘉清。

　戦世（いくさゆう）ぬ後（あと）お、うちなあぬあまくまんかい多（うふ）くぬ収容所（しゅうゆうじゅ）ぬ造（つく）らってぃ、いいくるぬ沖縄人（うちなあんちゅ）が籠（く）みらったるむぬやん。

　やしが、くまぬまんぐらんかいあたる収容所や、旧日本軍（ちゅうやまとぅいくさ）ぬ捕虜（いちどぅい）ぬ籠ゆる為（たみ）ぬむんなやい、他（ふか）とお変（か）わとたおたん。

　いいくる７千人（ななしんにん）なあん籠みらったるむぬやしが、後から後から捕虜ん上増（うゎあ）ち、構（かむ）い難（ぐり）さがあたらあ、３千人びけあ３千人（さんじんにん）びけんやハワイんかい連（そ）うてぃ行（い）かったん。

　うぬ捕虜ぬ中（なあか）んかい居（をぅ）たる沖縄人ぬ一人（ちゅい）が、戦世とぅ捕虜ぬ哀（あわ）りぬ様（さま）ぬ歌作（うたつく）たん。

　うりが「屋嘉節（やかぶし）」やん。

　やくとぅ、くまあ「屋嘉節」ぬ生（ん）まれたる所（とぅくる）んやん。

　あいゆかんぬ哀りぬ中、歌作ゆる肝心（ちむぐくる）ぬある沖縄人ぬん居たるむんやんでぃち、実（じゅん）に肝誇（ちむふく）いすん。

　やしが今（なま）あ、うんにいぬ面影（うむかじ）え見（み）いらん。

筆：比嘉清。